Петти донаторски кружок

06 јуни 2024 | 13:50

Собрани 1.000.033 денари здружени донации за влијателни иницијативи

Донаторскиот кружок на Конект по 5-ти пат покажа филантропија на дело! На 06 јуни 2024 година на најуспешниот донаторскиот кружок, над 150 граѓани и бизниси, поединци од сите сфери на животот, заеднички донираа за да направат значајна разлика во нашите заедници и покажаа дека заедно можеме да направиме промени и да ги земеме работите во наши раце.

„Воодушевени сме од ентузијазмот и солидарноста на дело што го покажува нашето друштво на жени и мажи филантропи што донираат заеднички и обмислено. Успехот на донаторскиот кружок ја покажува моќта на заедницата која прави промените кои сакаме да ги видиме остварени во општеството. Негуваме култура на солидарност и поддршка.“ – констатира г-а Никица Кусиникова, извршна директорка на Конект.

Не само што ја постигнавме крајната цел на настанот, туку заеднички ја триплиравме и собравме неверојатни 1.000.033 (еден милион и триесет и три денари. Донациите сè уште пристигнуваат. Сите заинтересирани граѓани и компании се повикуваат да пристапат на донаторскиот кружок. Ве поттикнуваме да се обратите во Конект и ќе ви помогнеме паметно да ја вложите својата донација.

Дополнително, 27 компании и поединци го поддржаа кружокот со финансиски и материјални донации. Граѓаните донираа, а бизнисите „НЛБ Банка“, „ЕВН“, Цементарница „Усје“, „Уника“, „Силкапор“, „Даути комерц“, „The Funding Network“ и „Фармахем“ ги удвојуваа вредностите на нивните донации за трите одбрани организации кои се претставија на овогодинешниот донаторски кружок:

  • Акција Здруженска – Женските кружоци се единствените места каде тие oрганизирано се охрабруваат и стануваат гласноговорнички. Дониравме во фондот за да продолжат да туркаат за пристап до вода, превоз, едукација, здравје и женски права во заедниците.
  • Енхелеус Лихнид – Во охридско с. Лакочереј и околината младите немаат каде да се дружат. Нивна голема желба е старото напуштено училиште да го пренаменат во мултифункционален креативен центар за млади каде тие ќе можат да создаваат, да се дружат, учат и забавуваат. Донациите ќе им помогнат на младите кои веќе работат на пренамена на објектот, кој безделничењето ќе го замени со организиран младински развој.
  • Иницијатива за правата на жените од Шуто Оризари – Насилството врз жените во Шуто Оризари често се смета за нормално во семејството. Дониравме за центарот што за само 8 месеци успеа да помогне на 65 жени и нивните деца. Помогнавме овој единствен центар да добие официјална лиценца од државата. Така ќе опстои на долг рок да нуди решенија на жените соочени со безизлез.

Конект во периодот кој доаѓа ќе потпише договори за донација со организациите и ќе го следи нивното работење, а со донаторите ќе одржува редовна комуникација и ќе ги информира за реализацијата и постигнувањата од нивната донација.

За дополнителни информации за кружокот и за да се информирате како да се вклучите во следните изданија, обратете се во Конект на 02/3224 198 или на konekt@konekt.org.mk и паметно вложете ја својата донација.

Настанот e организиран во рамки на проектот на УСАИД „Партнерства за донирање“, спроведуван од Здружение Конект, a во партнерство со Европскиот центар за непрофитно право, Стопанската Комора на Северо-Западна Македонија, Индиго и Американската Стопанска Комора.

Фотографиите за кружокот ги изработи Александар Чокрески. Повеќе фотографии од настанот можете да најдете на овој линк.