Кризен Центар „Надеж“ работи континуирано на проблемот со семејното насилство, односно, превенција, заштита и згрижување на жртви на семејно насилство. Националната СОС линија е бесплатна, достапна за целата територија на Р.Македонија и 24 часа седум дена во неделата. Информациите што се споделуваат на СОС телефонот се доверливи и се внимава на зачувување на приватноста. На линиите работи персоналот на Кризен Центар Надеж, односно обучените волонтери и супервизори кои во зависност од природата на повикот ги упатуваат жртвите или потецијалните жртви на семејно насилство кон понатамошните чекори и мерки за заштита во зависност од нивните потреби и во согласност со нивниот интерес. Персоналот е добро обучен за работа во кризни ситуации, слушање и комуникациски вештини, ресурси на заедницата, родови, религиозни и културни прашања. Преку СОС линијата жртвите на семејно насилство добиваат поттикнување и емоционална поддршка, посветено доволно време за сослушување, информирање и едукација за видовите на семејно насилство, законски права и слободи, начинот на итна заштита при насилство, кризно советување, упатување и помош. СОС линијата претставува мост кој ги поврзува жртвите со другите институции на системот кои се потребни во понатамошната заштита и затоа таа е првиот чекор до побезбеден живот.